ਟਰੰਪ ਪ੍ਰਸ਼ਾਸਨ ਜ਼ੇਲੇਂਸਕੀ ਅਤੇ ਪੁਤਿਨ ਵਿਚਕਾਰ ਇਕ ਇਤਿਹਾਸਕ ਮੁਲਾਕਾਤ ਦੀ ਕਰ ਰਿਹੈ ਤਿਆਰੀ- ਅਮਰੀਕੀ ਵਿਦੇਸ਼ ਮੰਤਰੀ

ਵਾਸ਼ਿੰਗਟਨ, 19 ਅਗਸਤ- ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੇ ਬੀਤੇ ਦਿਨ ਵਾਈਟ ਹਾਊਸ ਵਿਖੇ ਯੂਕਰੇਨ ਦੇ ਰਾਸ਼ਟਰਪਤੀ ਜ਼ੇਲੇਂਸਕੀ ਅਤੇ ਯੂਰਪੀਅਨ ਨੇਤਾਵਾਂ ਨਾਲ ਮੁਲਾਕਾਤ ਕੀਤੀ। ਰੂਸ ਅਤੇ ਯੂਕਰੇਨ ਵਿਚਕਾਰ ਜੰਗਬੰਦੀ ’ਤੇ ਕੋਈ ਸਮਝੌਤਾ ਨਹੀਂ ਹੋਇਆ। ਟਰੰਪ ਨੇ ਕਿਹਾ ਕਿ ਇਸ ਸਮੇਂ ਇੰਨੀ ਜਲਦੀ ਜੰਗਬੰਦੀ ਸੰਭਵ ਨਹੀਂ ਹੈ। ਹਾਲਾਂਕਿ, ਮੀਟਿੰਗ ਵਿਚ ਯੂਕਰੇਨ ਦੀ ਸੁਰੱਖਿਆ ਗਾਰੰਟੀ ’ਤੇ ਚਰਚਾ ਕੀਤੀ ਗਈ। ਟਰੰਪ ਨੇ ਕਿਹਾ ਕਿ ਅਮਰੀਕਾ ਅਤੇ ਯੂਰਪੀਅਨ ਦੇਸ਼ ਇਸ ’ਤੇ ਮਿਲ ਕੇ ਕੰਮ ਕਰਨਗੇ। ਇਸ ਦੇ ਨਾਲ ਹੀ, ਰੂਸੀ ਰਾਸ਼ਟਰਪਤੀ ਦਫ਼ਤਰ (ਕ੍ਰੇਮਲਿਨ) ਨੇ ਕਿਹਾ ਕਿ ਟਰੰਪ ਨੇ ਮੀਟਿੰਗ ਰੋਕ ਦਿੱਤੀ ਅਤੇ ਪੁਤਿਨ ਨਾਲ 40 ਮਿੰਟ ਲਈ ਫ਼ੋਨ ’ਤੇ ਗੱਲ ਕੀਤੀ।

ਇਸ ਦੌਰਾਨ ਪੁਤਿਨ ਨੇ ਰੂਸ ਅਤੇ ਯੂਕਰੇਨ ਦੇ ਪ੍ਰਤੀਨਿਧੀਆਂ ਵਿਚਕਾਰ ਸਿੱਧੀ ਗੱਲਬਾਤ ਦਾ ਸਮਰਥਨ ਕੀਤਾ। ਜਰਮਨ ਚਾਂਸਲਰ ਫਰੈਡਰਿਕ ਮਰਟਜ਼ ਨੇ ਕਿਹਾ ਕਿ ਟਰੰਪ ਨਾਲ ਫ਼ੋਨ ’ਤੇ ਗੱਲਬਾਤ ਦੌਰਾਨ, ਪੁਤਿਨ 15 ਦਿਨਾਂ ਦੇ ਅੰਦਰ ਜ਼ੇਲੇਂਸਕੀ ਨੂੰ ਮਿਲਣ ਲਈ ਸਹਿਮਤ ਹੋਏ ਹਨ।

ਮੀਟਿੰਗ ਤੋਂ ਬਾਅਦ ਜ਼ੇਲੇਂਸਕੀ ਨੇ ਇਕ ਪ੍ਰੈਸ ਕਾਨਫ਼ਰੰਸ ਕੀਤੀ ਅਤੇ ਕਿਹਾ ਕਿ ਯੂਕਰੇਨ ਸੁਰੱਖਿਆ ਗਾਰੰਟੀ ਦੇ ਬਦਲੇ ਯੂਰਪ ਦੇ ਪੈਸੇ ਨਾਲ 90 ਬਿਲੀਅਨ ਡਾਲਰ (ਲਗਭਗ 8 ਲੱਖ ਕਰੋੜ ਰੁਪਏ) ਦੇ ਅਮਰੀਕੀ ਹਥਿਆਰ ਖਰੀਦੇਗਾ।

ਜ਼ੇਲੇਨਸਕੀ ਨੇ ਅੱਗੇ ਕਿਹਾ ਕਿ ਸਾਡੇ ਕੋਲ ਰਾਸ਼ਟਰਪਤੀ ਪੁਤਿਨ ਨਾਲ ਮੁਲਾਕਾਤ ਦੀ ਕੋਈ ਤਾਰੀਖ ਨਹੀਂ ਹੈ। ਅਸੀਂ ਪੁਸ਼ਟੀ ਕੀਤੀ ਹੈ ਕਿ ਅਸੀਂ ਤਿੰਨ-ਪੱਖੀ ਮੀਟਿੰਗ ਲਈ ਤਿਆਰ ਹਾਂ ਅਤੇ ਜੇਕਰ ਰੂਸ ਸੰਯੁਕਤ ਰਾਜ ਦੇ ਰਾਸ਼ਟਰਪਤੀ ਨੂੰ ਦੋ-ਪੱਖੀ ਮੀਟਿੰਗ ਦਾ ਪ੍ਰਸਤਾਵ ਦਿੰਦਾ ਹੈ, ਤਾਂ ਅਸੀਂ ਦੋ-ਪੱਖੀ ਮੀਟਿੰਗ ਦਾ ਨਤੀਜਾ ਦੇਖਾਂਗੇ। ਉਸ ਤੋਂ ਬਾਅਦ, ਅਸੀਂ ਤਿੰਨ-ਪੱਖੀ ਲਈ ਜਾ ਸਕਦੇ ਹਾਂ। ਯੂਕਰੇਨ ਸ਼ਾਂਤੀ ਦੇ ਰਾਹ ’ਤੇ ਕਦੇ ਨਹੀਂ ਰੁਕੇਗਾ ਅਤੇ ਅਸੀਂ ਨੇਤਾਵਾਂ ਦੇ ਪੱਧਰ ’ਤੇ ਕਿਸੇ ਵੀ ਤਰ੍ਹਾਂ ਦੀ ਗੱਲਬਾਤ ਲਈ ਤਿਆਰ ਹਾਂ।

ਇਸ ਦੇ ਨਾਲ ਹੀ ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨੇ ਕਿਹਾ ਕਿ ਟਰੰਪ ਪ੍ਰਸ਼ਾਸਨ ਜ਼ੇਲੇਂਸਕੀ ਅਤੇ ਪੁਤਿਨ ਵਿਚਕਾਰ ਇਕ ਇਤਿਹਾਸਕ ਮੁਲਾਕਾਤ ਦੀ ਤਿਆਰੀ ਕਰ ਰਿਹਾ ਹੈ। ਰੂਬੀਓ ਨੇ ਦੱਸਿਆ ਕਿ ਜੇਕਰ ਇਹ ਮੁਲਾਕਾਤ ਸਫ਼ਲ ਹੁੰਦੀ ਹੈ, ਤਾਂ ਇਸ ਤੋਂ ਬਾਅਦ ਟਰੰਪ, ਪੁਤਿਨ ਅਤੇ ਜ਼ੇਲੇਂਸਕੀ ਦੀ ਇਕ ਤਿਕੋਣੀ ਮੀਟਿੰਗ ਹੋ ਸਕਦੀ ਹੈ।

ਉਨ੍ਹਾਂ ਕਿਹਾ ਕਿ ਅਸੀਂ ਅਜੇ ਉੱਥੇ ਨਹੀਂ ਪਹੁੰਚੇ ਹਾਂ, ਪਰ ਇਹ ਸਾਡਾ ਟੀਚਾ ਹੈ। ਇਸ ਨੂੰ ਕਿਵੇਂ ਪ੍ਰਾਪਤ ਕਰਨਾ ਹੈ, ਅੱਜ ਇਸ ਬਾਰੇ ਗੱਲਬਾਤ ਹੋਈ।

ਰੂਬੀਓ ਨੇ ਕਿਹਾ ਕਿ ਪੁਤਿਨ ਦਾ ‘ਹਾਂ, ਮੈਂ ਜ਼ੇਲੇਂਸਕੀ ਨੂੰ ਮਿਲਾਂਗਾ’ ਕਹਿਣਾ ਆਪਣੇ ਆਪ ਵਿਚ ਇਕ ਵੱਡੀ ਗੱਲ ਹੈ। ਮੈਂ ਇਹ ਨਹੀਂ ਕਹਿ ਰਿਹਾ ਕਿ ਉਹ ਦੋਸਤ ਬਣ ਜਾਣਗੇ ਜਾਂ ਸ਼ਾਂਤੀ ਸਮਝੌਤਾ ਹੋਵੇਗਾ, ਪਰ ਇਹ ਕਿ ਹੁਣ ਇਕ ਦੂਜੇ ਨਾਲ ਗੱਲ ਕਰ ਰਹੇ ਹਨ, ਪਿਛਲੇ ਸਾਢੇ ਤਿੰਨ ਸਾਲਾਂ ਵਿਚ ਅਜਿਹਾ ਨਹੀਂ ਹੋਇਆ।