ਕੋਲੰਬੀਆ: ਅੱਤਵਾਦੀ ਹਮਲਿਆਂ ਵਿਚ 8 ਲੋਕਾਂ ਦੀ ਮੌਤ

ਬੋਗੋਟਾ, 11 ਜੂਨ- ਦੱਖਣੀ-ਪੱਛਮੀ ਕੋਲੰਬੀਆ ਵਿਚ ਅੱਤਵਾਦੀ ਹਮਲਿਆਂ ਵਿਚ ਬੀਤੇ ਦਿਨ ਅੱਠ ਲੋਕ ਮਾਰੇ ਗਏ ਅਤੇ 28 ਹੋਰ ਜ਼ਖਮੀ ਹੋ ਗਏ। ਇਸ ਸੰਬੰਧੀ ਸਥਾਨਕ ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ। ਇਸ ਵਿਚ ਤਿੰਨ ਪੁਲਿਸਕਰਮੀਆਂ ਦੀ ਵੀ ਮੌਤ ਹੋ ਗਈ। ਕੋਲੰਬੀਆ ਦੀ ਰਾਸ਼ਟਰੀ ਫੌਜ ਦੀ ਤੀਜੀ ਡਿਵੀਜ਼ਨ ਨੇ ਕੋਲੰਬੀਆ ਦੇ ਦੱਖਣ-ਪੱਛਮੀ ਵਿਭਾਗਾਂ ਦੇ ਵੱਖ-ਵੱਖ ਕਸਬਿਆਂ ਵਿੱਚ ਹੋਏ ਹਮਲਿਆਂ ਦੀ ਨਿੰਦਾ ਕੀਤੀ। ਉਨ੍ਹਾਂ ਕਿਹਾ ਕਿ ਅਸੀਂ ਕੋਲੰਬੀਆ ਦੀ ਪੁਲਿਸ ਲਈ ਆਪਣਾ ਪੂਰਾ ਸਮਰਥਨ ਪ੍ਰਗਟ ਕਰਦੇ ਹਾਂ, ਜੋ ਕਿ ਇਹਨਾਂ ਕਾਇਰਤਾਪੂਰਨ ਹਮਲਿਆਂ ਦਾ ਸਿੱਧਾ ਨਿਸ਼ਾਨਾ ਰਹੀ ਹੈ ਅਤੇ ਅਸੀਂ ਨਾਗਰਿਕਾਂ ਦੀ ਰੱਖਿਆ ਅਤੇ ਸੁਰੱਖਿਆ ਪ੍ਰਤੀ ਆਪਣੀ ਅਟੱਲ ਵਚਨਬੱਧਤਾ ਨੂੰ ਦੁਹਰਾਉਂਦੇ ਹਾਂ। ਫੌਜ ਨੇ ਐਲਾਨ ਕੀਤਾ ਕਿ ਪ੍ਰਭਾਵਿਤ ਇਲਾਕਿਆਂ ਵਿਚ ਸੁਰੱਖਿਆ ਬਲਾਂ ਨੂੰ ਮਜ਼ਬੂਤੀ ਵਜੋਂ ਤਾਇਨਾਤ ਕੀਤਾ ਗਿਆ ਹੈ।